پی ڈی ایم کا الیکشن کمیشن کے سامنے احتجاج، سیکیورٹی کے سخت انتظامات

اپوزیشن جماعتوں کے اتحاد پاکستان ڈیموکریٹک موومنٹ (پی ڈی ایم) کی جانب سےالیکشن کمیشن آف پاکستان (ای سی پی) میں پاکستان تحریک انصاف (پی ٹی آئی) کے خلاف غیر ملکی فنڈنگ کیس کے فیصلے میں تاخیر پر آج ای سی پی کی عمارت کے سامنے احتجاج کیا جارہا ہے۔

خیال رہے کہ حکومت کی جانب سے پی ڈی ایم کے احتجاج میں کوئی رکاوٹ نہ ڈالنے کا اعلان کیا گیا تھا، اس موقع پر دارالحکومت کی سیکیورٹی انتہائی سخت کردی گئی ہے اور پولیس نے ریڈ زون کے تمام داخلی اور خارجی راستوں کو سیل کردیا ہے۔

احتجاجی منصوبے سے آگاہ کرتے ہوئے مسلم لیگ (ن) کی ترجمان مریم اورنگزیب نے بتایا کہ مختلف علاقوں سے آنے والی پی ڈی ایم کی ریلیاں کشمیر چوک پر اکھٹا ہو کر الیکشن کمیشن روانہ ہوں گی۔

رہنماؤں کی آمد سے متعلق ان کا کہنا تھا کہ پی ڈی ایم قیادت مولانا فضل الرحمٰن کے گھر سے شاہراہ دستور پہنچے گی۔

پی ڈی ایم کی قیادت کے مطابق حزب اختلاف کی جماعتیں الیکشن کمیشن آف پاکستان کی عمارت کے باہر ریلی نکالیں گی تاکہ کمیشن پر دباؤ ڈالیں کہ وہ پاکستان تحریک انصاف (پی ٹی آئی) کے خلاف غیرملکی فنڈنگ ​​کیس دوبارہ شروع کرے اور اس پر فیصلہ کرے، ان کا کمیشن کے ہیڈ کوارٹر کے باہر دھرنا دینے کا کوئی منصوبہ نہیں ہے اور یہ جلسہ دو سے تین گھنٹوں کے بعد منتشر ہوجائے گا۔

حکومت کی جانب سے اس احتجاج کے انعقاد میں کوئی رکاوٹ نہیں ڈالی البتہ اعلان کیا گیا کہ اگر احتجاج میں شریک افراد کی جانب سے کوئی گڑبڑ کی گئی تو اس سے سختی نمٹا جائے گا۔

مذکورہ احتجاج میں شرکت کے لیے پی ڈی ایم جماعتوں کے کارکنان مختلف قافلوں کی شکل میں اسلام آباد پہنچیں گے۔

دوسری جانب انتظامیہ نے پارلیمنٹ ہاؤس، ایوان صدر، وزیر اعظم ہاؤس اور سپریم کورٹ جیسی اہم عمارتوں کے حامل ریڈ زون کو 10 جماعتی اپوزیشن اتحاد کے کارکنوں کے آنے سے پہلے ہی محفوظ کر لیا ہے۔

اس ضمن میں وفاقی وزیر داخلہ شیخ رشید نے دارلحکومت میں پی ڈی ایم کے احتجاج کے موقع پر درپیش صورتحال خود مانیٹر کرنے کا فیصلہ کیا۔

شیخ رشید نے سیکریٹری داخلہ یوسف نسیم کھوکھر کے ہمراہ خصوصی کنٹرول روم کا دورہ کیا اور وہاں سہولیات کا جائزہ لیا. کنٹرول روم سے اسلام آباد کو مانیٹر کیاجارہا ہے۔