fbpx
پاکستان سیاست

وزارتوں میں تبدیلی، نا لائق کپتان ہی ہمیشہ نالائق ٹیم کا انتخاب کرتا ہے : مریم اورنگزیب

پاکستان مسلم لیگ (ن) کی ترجمان مریم اورنگزیب نے وفاقی کابینہ میں بڑے پیمانے پر ردو بدل پر شدید تنقید کرتے ہوئے کہا ہے کہ نالائق کپتان ہمیشہ نالائق ٹیم کا انتخاب کرتا ہے، بیٹنگ آرڈر کی تبدیلی کے بجائے نالائق کپتان کی تبدیلی پاکستان کے مفاد میں ہے۔

مریم اورنگ زیب نے وزیراعظم عمران خان کے خطاب پر رد عمل دیتے ہوئے کہا کہ عمران صاحب آپ بڑے پریشان تھے، اتنی گھبراہٹ اور اتنا غصہ کیوں ہے، آپ نے کہا کوئی آپ کی حکومت گرا رہاہے، قوم کو بتائیں کون آپ کی حکومت گرارہا ہے، آپ کی نالائقی، نا اہلی یا آپ کی زبان حکومت کو گرا رہی ہے کیونکہ اس حکومت کو گرانے کے لیے آپ کی نالائقی، نااہلی اور زبان ہی کافی ہے۔

انہوں نے کہا کہ ابھی تو اپوزیشن نے باؤلنگ ہی نہیں کرائی لیکن آدھی ٹیم ہٹ وکٹ ہوچکی ہے، پاکستان کے مفاد میں بیٹنگ آرڈر نہیں بلکہ نالائق کپتان کی تبدیلی ہے۔

ترجمان مسلم لیگ (ن) نے کہا کہ جب ٹیم کا کپتان ہی نالائق ہوتو ٹیم کیا کرے گی، نالائق کپتان ہمیشہ نالائق ٹیم کا چناؤ کرتا ہے۔

وزیراعظم کو تنقید کا نشانہ بناتے ہوئے انہوں نے کہا کہ عمران خان صاحب اب شور کرنے سے بات نہیں بنے گی، آپ کی نالائقی کی وجہ سے پچھلے 9 ماہ سے عوام جس کرب سے گزر رہے ہیں اس پر آپ کو جواب دینا ہوگا۔

وفاقی کابینہ میں ردوبدل کی جانب اشارہ کرتے ہوئے انہوں نے کہا کہ کابینہ میں ردوبدل کے بعد وزیراعلیٰ پنجاب عثمان بزدار، گورنر کے پی شاہ فرمان اور وزیراعلیٰ کے پی محمود خان بھی گھبرانے والی فہرست میں شامل ہوگئے ہیں۔

ان کا کہنا تھا کہ عمران صاحب! نوجوان نوکری نہیں بلکہ دعا مانگ رہے ہیں کہ آپ کی نوکری چلی جائے، پاکستان کے عوام جان چکے ہیں کہ پاکستان ویسے ہی چل رہا ہے جیسے پشاور کی میٹروبس چل رہی ہے، پیسوں سے کچھ نہیں ہوتا اگر ہوتا تو پشاور میں ایک کھرب سے میٹرو کے کھڈے نہ ہوتے۔

مریم اورنگ زیب نے اپنے دور حکومت کا حوالہ دیتے ہوئے کہا کہ نواز شریف نے کبھی نہیں کہا کہ ملک چور ہے اور ملک کے پاس پیسے نہیں ، پاک-چین اقتصادی راہداری (سی پیک) کا تحفہ دے کر ملک کو نا قابلِ تسخیر بنایا، نوجوانوں کو اُمید دی اور اللہ تعالیٰ کی مدد سے نا ممکن کو ممکن بنایا۔

ان کا کہنا تھا کہ نوازشریف نے گیارہ ہزار میگاواٹ بجلی بناکر عوام کو لوڈشیڈنگ کی اذیت سے نجات دلائی، 17 سو کلو میٹر موٹر ویز بنائیں اور ملک کو دہشت گردی سے پاک کیا۔

ترجمان مسلم لیگ (ن) کا کہنا تھا کہ کابینہ کا حجم بڑھانے سے نہیں نیت ٹھیک کرنے سے کارکردگی بہتر ہو گی۔

خیال رہے کہ اورکزئی میں جلسے سے خطاب کرتے ہوئے وزیراعظم عمران خان نے آئندہ بھی کابینہ میں تبدیلیوں کا اعلان کرتے ہوئے کہا تھا کہ جو وزیر ملک کے لیے ٹھیک نہیں ہوگا اس کو تبدیل کردوں گا، ٹیم کا بیٹنگ آرڈر تبدیل کیا ہے اور اس وزیر کو لاؤں گا جو ملک کے لیے فائدہ مند ہوگا۔

خیبرپختونخوا (کے پی) کے وزیر اعلیٰ محمود خان اور پنجاب کے وزیر اعلیٰ عثمان بزدار کو مخاطب کرتے ہوئے کہا تھا کہ ایک اچھا کپتان مسلسل اپنی ٹیم کی طرف دیکھ رہا ہوتا ہے، اچھے کپتان کو میچ جیتنا ہوتا ہے اور اس کے لیے ٹیم پر نظر رکھنی پڑتی ہے جبکہ کئی مرتبہ بیٹنگ آرڈر تبدیل کرنا ہوتا ہے۔

انہوں نے کہا تھا کہ کئی مرتبہ بیٹسمین کو اوپر، نیچے کھلانا پڑتا اور کبھی نئے کھلاڑی کو ٹیم میں لانا پڑتا ہے، جو کپتان ہوتا ہے، اس کا مقصد صرف ٹیم کو جتانا ہوتا ہے اور وزیر اعظم کا بھی ایک مقصد ہوتا ہے۔

عمران خان کا کہنا تھا کہ میرا مقصد ہے کہ میں اپنی قوم کو جتاؤں اور اٹھاؤں، میں اللہ کو جوابدہ ہوں، اللہ مجھ سے چاہتا ہے کہ میں ملک کے کمزور لوگوں کو اٹھاؤں یہ میرا مقصد ہے، اس کےلیے ابھی اپنی ٹیم میں تھوڑی تبدیلی کی ہے اور میں آگے بھی کروں گا۔

قبل ازیں وفاقی وزیر خزانہ اسد عمر کے استعفے کے بعد کابینہ میں بڑی تبدیلیاں کرتے ہوئے وزیرپیٹرولیم غلام سرور خان، وزیراطلاعات و نشریات فواد چوہدری اور وزیر مملکت برائے داخلہ شہریار آفریدی سمیت دیگر کے قلم دان تبدیل کر دیے تھے جبکہ وزیرصحت عامر محمود کیانی سے استعفیٰ لیا گیا تھا۔


پاک ایشیاء ایک غیر منافع بخش ادارہ ہے۔ ہماری صحافت کو سرکاری اور کارپوریٹ دباؤ سے آزاد رکھنے کے لیے  مالی تعاون کیجیے نیز اس خبر کے حوالے سے اپنی آراء کا اظہار کمنٹس میں کریں اور شیئر کر کے ہماری حوصلہ افزائی کریں

About the author

عدیل رحمان (معاون مُدیر)

عدیل رحمان پاک ایشیاء میں بطور معاون مُدیر کے طور پر اپنی خدمات ادا کر رہے ہیں- یہ پاک ایشیاء کے ابتدائی ساتھیوں میں سے ایک ہیں اور انتہائی جانفشانی سے کام کرتے ہیں اللہ تعالیٰ نے انہیں منفرد تخلیقی صلاحیتوں سے نوازا ہے جس کا اظہار اکثر اُن کی خبروں کی سُرخیوں سے بھی لگایا جا سکتا ہے۔

Add Comment

Click here to post a comment

This site uses Akismet to reduce spam. Learn how your comment data is processed.




From Google

WordPress Video Lightbox Plugin