fbpx
پاکستان مذہب

حکومت نے حافظ سعید کو نماز پڑھانے سے روک دیا

لاہور: حکومتِ پنجاب نے چوبرجی پر قائم جماعت الدعوۃ کے ہیڈ کوارٹرز جامعہ القدسیہ اور مرید کے میں موجود مرکز کا انتظام سنبھال کر ایڈمنسٹریٹر مقرر کردیے۔

اس کے ساتھ انتظامیہ نے چوبرجی کی جامعہ مسجد قدسیہ میں جماعت الدعوۃ کے سربراہ حافظ سعید کے نماز کی امامت کرنے پر پابندی لگاتے ہوئے وہاں بھی ایک سرکاری عہدیدار مقرر کردیا۔

اس بارے میں میڈیا سے گفتگو کرتے ہوئے ایک عہدیدار کا کہنا تھا کہ جامعہ مسجد کا انتظام سنبھالنے میں معاونت کے لیے پولیس کا دستہ بھی ساتھ روانہ کیا گیا جبکہ پولیس نے رات گئے مسجد سے متصل مرکز کو بھی تالا لگا دیا۔

ان کا مزید کہنا تھا کہ لاہور میں جماعت الدعوۃ کی قیادت نے 75 ایمبولینسز بھی پولیس کے حوالے کردیں جنہیں ریسکیو 1122 کو دیتے ہوئے ہدایت کی گئی کہ انہیں ری ڈیزائن کر کے ایمرجنسی سروس کا مستقل حصہ بنایا جائے۔

اس کے ساتھ مرید کے میں قائم جماعت الدعوۃ کے مرکز پر بھی سیکیورٹی سخت کردی گئی جہاں حکومت نے مختلف شعبہ جات میں 2 خواتین سمیت 6 منتظمین مقرر کیے۔

سرکاری عہدیدار کا کہنا تھا کہ خواتین منتظمین میں سے ایک خاتون کو مرید کے مرکز میں واقع لڑکیوں کے اسکول جبکہ دوسری کو ایک ہسپتال میں تعینات کیا گیا۔

علاوہ ازیں ایک تحصیلدار کو مرید کے مرکز کے احاطے کے امور سنبھالنے کے لیے مقرر کیا گیا جہاں 300 سے زائد خاندان رہائش پذیر ہیں۔

ایک سوال کے جواب میں عہدیدار نے بتایا کہ لاہور میں سیکڑوں مساجد جماعت الدعوۃ کے زیرانتظام ہیں جنہیں آئندہ کچھ روز میں مرحلہ وار حکومت کے زیرانتظام کردیا جائے گا۔

دوسری جانب حکومت نے خیبرپختونخوا کے قبائلی ضلع باجوڑ میں بھی جماعت الدعوۃ کے ایک مدرسے کو اپنی تحویل میں لیا۔

ڈپٹی کمشنر عثمان محمود کی جانب سے جاری بیان کے مطابق مذکورہ اقدام وفاقی حکومت کی ان ہدایات کی روشنی میں اٹھایا گیا جس میں کالعدم تنظیموں کے اثاثے ضبط کرنے کا کہا گیا تھا۔

بیان میں مزید بتایا گیا کہ جماعت الدعوۃ کے زیر انتظام مدرسہ تعلیم الاسلام تحصیل مہمند کے علاقے میں قائم تھا جسے ضلعی انتظامیہ نے اپنی تحویل میں لے لیا۔

بعدازاں انتظامیہ نے مدرسے کا انتظام سنبھال کر لغاری کے سرکاری ہائی اسکول کے ہیڈ ماسٹر شیر ولی خان کو مدرسے کا انچارج مقرر کردیا تاہم جاری کیے گئے بیان میں مدرسے کے ناظم یا اساتذہ کو حراست میں لیے جانے کے حوالے سے کوئی معلومات نہیں دی گئی۔

دھر چترال میں بھی ضلعی انتظامیہ نے جماعت الدعوۃ کی فلاحی تنظیم فلاحِ انسانیت فاؤنڈیشن کے زیرانتظام چلنے والے مرکزِ صحت کو اپنی تحویل میں لے لیا۔

اس بارے میں ڈپٹی کمشنر خورشید عالم محسود نے ڈان کو بتایا کہ سبزی منڈی کے قریب قائم ہسپتال کا انتظام ڈسٹرک ہیڈ کوارٹر ہسپتال کے میڈیکل سپرنٹنڈٹ(ایم ایس) کے حوالے کردیا گیا۔

جب ان سے کالعدم تنظیم کی فلاحی سہولیات اور دفتر کے بارے میں پوچھا گیا تو انہوں نے بتایا کہ وہ پہلے ہی بند کردیے گئے تھے۔


پاک ایشیاء ایک غیر منافع بخش ادارہ ہے۔ ہماری صحافت کو سرکاری اور کارپوریٹ دباؤ سے آزاد رکھنے کے لیے  مالی تعاون کیجیے نیز اس خبر کے حوالے سے اپنی آراء کا اظہار کمنٹس میں کریں اور شیئر کر کے ہماری حوصلہ افزائی کریں

About the author

عدیل رحمان (معاون مُدیر)

عدیل رحمان پاک ایشیاء میں بطور معاون مُدیر کے طور پر اپنی خدمات ادا کر رہے ہیں- یہ پاک ایشیاء کے ابتدائی ساتھیوں میں سے ایک ہیں اور انتہائی جانفشانی سے کام کرتے ہیں اللہ تعالیٰ نے انہیں منفرد تخلیقی صلاحیتوں سے نوازا ہے جس کا اظہار اکثر اُن کی خبروں کی سُرخیوں سے بھی لگایا جا سکتا ہے۔

Add Comment

Click here to post a comment

This site uses Akismet to reduce spam. Learn how your comment data is processed.




From Google

WordPress Video Lightbox Plugin