fbpx
پاکستان معیشت

سعودی عرب کا پاکستان میں آئل ریفائنری لگانے کا فیصلہ

پاکستان اور سعودی عرب سرمایہ کاری کے ایک بڑے منصوبے کے لیے مفاہمتی یادداشت پر دستخط کرنے کو تیار ہوگئے ہیں جس کے تحت گوادر میں کئی ارب ڈالر کی لاگت سے سعودی آرامکو آئل ریفائنری کی تعمیر ہوگی۔

سعودی عرب کے روزمانہ عرب نیوز کی رپورٹ کے مطابق سعودی عرب جلد ہی مفاہمتی یاد داشت پر دستخط کرے گا۔

قبل ازیں کابینہ کے ایک رکن نے تصدیق کی تھی کہ سعودی ولی عہد محمد بن سلمان فروری کے پہلے ہفتے میں پاکستان آئیں گے اور ان کی درخواست پر بننے والے پیٹروکیمکل کمپلیکس کی تعمیر کے لیے مفاہمتی یاد داشت پر دستخط ہوں گے۔

وزیراعظم عمران خان نے اگست 2018 میں منصب سنبھالنے کے بعد اپنا پہلا غیرملکی دورہ سعودی عرب کا کیا تھا جبکہ سعودی عرب کی جانب سے پاکستان کو خسارے پر قابو پانے کے لیے 3 اعشاریہ 18 کی شرح سود پر 2 ارب ڈالر فراہم کیے گئے تھے جبکہ ایک ارب ڈالر کی تیسری قسط بھی فروری کے پہلے ہفتے میں مل جائے گی۔

سعودی عرب کی جانب سے پاکستان کو ماہانہ 274 ملین ڈالر کی اوسط سے تیل کی فراہمی بھی اسی مہینے شروع ہوگی۔

عرب نیوز کے مطابق فروری میں اعلیٰ سطح کے سعودی وفد کے سامنے پاکستان آئل ریفائنری سمیت سرمایہ کاری کے کئی معاہدوں پر دستخط کرے گا۔

وزیراطلاعات فواد چوہدری نے اس رپورٹ کی تصدیق کر دی ہے۔

عرب نیوز کے مطابق فواد چوہدری کا کہنا تھا کہ ‘آئل ریفائنری کا منصوبہ پاکستان میں سعودی سرمایہ کاری کا سب سے بڑا منصوبہ ہے’۔

پاکستان بورڈ آف انوسٹمنٹ کے چیئرمین ہارون شریف نے عرب نیوز کو بتایا کہ ‘آرامکو آئل ریفائنری کے مفاہمتی یادداشت کے عمل کو حتمی شکل دینے کے لیے کراچی سے 15 رکنی سعودی وفد نے گوادر کا دورہ کیا تھا’۔

ہارون شریف کا کہنا تھا کہ ‘آرامکو آئل ریفائنری کی تعمیر کے لیے ہم مفاہمتی یادداشت کو حتمی شکل دے چکے ہیں اور تمام ضوابط پر اتفاق ہوگیا ہے اور مناسب وقت پر معاہدے پر دستخط ہوں گے’۔

اس سے قبل بھی ہارون شریف نے کہا تھا کہ ‘ہم چند ہفتوں میں سعودی آرامکو اور ایکوا پاور سے مفاہمتی یادداشت پر دستخط کریں گے کیونکہ سعودی آرامکو پاکستان میں آئل ریفائنری اور پیٹروکیمیکل کمپلیکس تعمیر کرنا چاہتی ہے جبکہ ایکوا پاکستان میں توانائی کے شعبے میں سرمایہ کاری کرے گی’۔

چیئرمین بورڈ آف انوسٹمنٹ کا کہنا تھا کہ ‘مجھے سعودی عرب سے 3 برس کے دوران 15 ارب ڈالر کی سرمایہ کاری آنے کی توقع ہے کیونکہ پاکستان میں آئل ریفائنری اور پیٹروکیمیکل کی سرمایہ کاری سے بالترتیب 6 ارب ڈالر اور 10 ڈالر کی آمدن کا تخیمنہ لگایا گیا ہے’۔

وفاقی وزیر خزانہ اسد عمر نے گزشتہ ماہ اپنے ایک بیان میں کہا تھا کہ سعودی عرب سے سرمایہ کاری کا ایک پیکیج آرہا ہے جو پاکستان کی تاریخ میں سب سے بڑی بیرونی سرمایہ کاری ہوگی جس کا جلد اعلان کیا جائے گا۔


پاک ایشیاء ایک غیر منافع بخش ادارہ ہے۔ ہماری صحافت کو سرکاری اور کارپوریٹ دباؤ سے آزاد رکھنے کے لیے  مالی تعاون کیجیے نیز اس خبر کے حوالے سے اپنی آراء کا اظہار کمنٹس میں کریں اور شیئر کر کے ہماری حوصلہ افزائی کریں

About the author

عدیل رحمان (معاون مُدیر)

عدیل رحمان پاک ایشیاء میں بطور معاون مُدیر کے طور پر اپنی خدمات ادا کر رہے ہیں- یہ پاک ایشیاء کے ابتدائی ساتھیوں میں سے ایک ہیں اور انتہائی جانفشانی سے کام کرتے ہیں اللہ تعالیٰ نے انہیں منفرد تخلیقی صلاحیتوں سے نوازا ہے جس کا اظہار اکثر اُن کی خبروں کی سُرخیوں سے بھی لگایا جا سکتا ہے۔

Add Comment

Click here to post a comment

This site uses Akismet to reduce spam. Learn how your comment data is processed.

WordPress Video Lightbox Plugin