پاکستان سیاست

تجاوزات کے خلاف آپریشن، کسی کے ساتھ زیادتی نہیں‌ ہوگی، نظرثانی اپیل دائر کردی، وزیر اعظم

کراچی : وزیر اعظم عمران خان نے کہا ہے کہ حکومت صوبے اور کراچی کی ترقی کے لیے اقدامات کر رہی ہے، تجاوزات آپریشن میں کسی کے ساتھ ناانصافی نہیں ہوگی۔

تفصیلات کے مطابق وزیر اعظم پاکستان عمران ایک روزہ دورے پر کراچی پہنچ گئے، گورنر سندھ عمران اسماعیل اور وزیر اعظم کی ون آن ون ملاقات میں صوبے کی سیاسی و امن و امان کی صورتحال پر بات چیت ہوئی۔

وزیر اعظم اور گورنر سندھ کے درمیان ہونے والی ملاقات میں اتحادی جماعتوں کے ساتھ اتحاد، ترقیاتی منصوبوں پر بھی گفتگو کی گئی جبکہ عمران اسماعیل نے وزیر اعظم کو گلستان جوہر میں ہونے والے دھماکے کی تفصیلات سے بھی آگاہ کیا۔

وزیر اعظم عمران خان نے کہا کہ حکومت کراچی سمیت صوبے کی ترقی کے لیے اقدامات کررہی ہے، شہر قائد کو اس کا وقار اور دوبارہ معاشی ترقی کی طرف گامزن کرنا ہے۔

وزیر اعظم نے کہا کہ وفاق کے تعاون سے جاری منصوبے جلد مکمل کیے جائیں گے، صوبے اور وفاق میں ہم آہنگی کو فروغ دیا جائے گا اور تاجروں کے خدشات و مسائل دور کیے جائیں گے۔

گورنر سندھ نے وزیر اعظم کو بریفنگ دیتے ہوئے بتایا کہ آئی جی سندھ سے دھماکے کی رپورٹ طلب کرلی گئی ہے، دہشت گردوں کو ہر صورت بے نقاب کیا جائے گا۔

عمران اسماعیل نے وزیر اعظم عمران خان کو شہر میں جاری تجاوزات کے خلاف آپریشن، تاجروں کے مسائل اور عوام میں پھیلی بے چینی سے بھی آگاہ کیا۔

وزیر اعظم عمران خان کا کہنا تھا کہ ’تجاوزات کے خلاف آپریشن میں کسی سےناانصافی نہیں ہوگی، ہماری حکومت کا وژن بےگھر افراد کو گھر فراہم کرنا ہے، حکومت کسی کےساتھ زیادتی نہیں ہوگی اس لیے ہم نے نظر ثانی اپیل دائر کردی‘۔

بعد ازاں عمران خان کی وزیر اعلیٰ سندھ مراد علی شاہ سے ملاقات ہوئی جس میں صوبے میں امن و امان کی بہتری، ترقیاتی منصوبوں سمیت دیگر امور پر تبادلہ خیال کیا گیا۔

عمران خان کا کہنا تھا کہ ’امن کا دائمی قیام ہی کراچی کو ترقی کی منازل پرلے جاسکتا ہے، انٹیلی جنس اداروں درمیان معلوماتی تبادلے کے نظام کومضبوط بناناہوگا، اندرون سندھ میں انصاف اور بنیادی حقوق فراہم کرنا حکومت کی اولین ترجیح ہے، صحت ، تعلیم سمیت دیگر شعبوں میں بھی وفاق اپنا تعاون جاری رکھے گا‘


پاک ایشیاء ایک غیر منافع بخش ادارہ ہے۔ ہماری صحافت کو سرکاری اور کارپوریٹ دباؤ سے آزاد رکھنے کے لیے مالی تعاون کیجیے نیز اس خبر کے حوالے سے اپنی آراء کا اظہار کمنٹس میں کریں اور شیئر کر کے ہماری حوصلہ افزائی کریں

About the author

عدیل رحمان (معاون مُدیر)

عدیل رحمان پاک ایشیاء میں بطور معاون مُدیر کے طور پر اپنی خدمات ادا کر رہے ہیں- یہ پاک ایشیاء کے ابتدائی ساتھیوں میں سے ایک ہیں اور انتہائی جانفشانی سے کام کرتے ہیں اللہ تعالیٰ نے انہیں منفرد تخلیقی صلاحیتوں سے نوازا ہے جس کا اظہار اکثر اُن کی خبروں کی سُرخیوں سے بھی لگایا جا سکتا ہے۔

Add Comment

Click here to post a comment

This site uses Akismet to reduce spam. Learn how your comment data is processed.

WordPress Video Lightbox Plugin