fbpx
پاکستان تازہ خبر

پبلک پروکیورمنٹ ریگولیٹری اتھارٹی میں غیر قانونی بھرتیوں کا انکشاف

حکومتی اداروں اور وزارتوں میں شفافیت کو یقینی بنانے کے لیے قائم کردہ ادارہ پبلک پروکیورمنٹ ریگولیٹری اتھارٹی(پی پی آر اے) خود ہی غیرشفافیت کی نظر ہو گیا اور ادارے پر غیرشفاف اور غیرقانونی طریقے سے 32تقرریوں کا الزام عائد کیا گیا ہے۔

 پبلک پروکیورمنٹ ریگولیٹری اتھارٹی کے آڈٹ کے دوران آڈیٹر جنرل آف پاکستان نے ان تقرریوں پر سوالات اٹھائے۔

یکم جنوری 1992 کو اسٹیبلشمنٹ ڈویژن کی جانب سے جاری کردہ میمورنڈم میں کہا گیا تھا کہ کوئی بھی وزارت، ڈویژن، محکمہ اور آرگنائزیشن آسامیوں کی تشہیر کیے گئے بغیر کسی بھی عہدے کے لیے کوئی درخواست موصول نہیں کرے گا۔

آڈٹ میں اعتراض اٹھایا گیا کہ پبلک پروکیورمنٹ ریگولیٹری اتھارٹی کی مینجمنٹ نے محکمہ جاتی طریقہ کار کو مدنظر رکھے بغیر ہی آسامیوں کا اشتہار دیے بغیر ملازمین کو بھرتی کر لیا۔

لہٰذا اشتہار دیے بغیر کسی بھی اسٹاف کی تقرری خلاف ضابطہ اور ادارہ ایسا کرنے کا مجاز نہیں۔

آڈٹ کے اعتراض کے بعد ایک عام شہری بریگیڈیئر ریٹائرڈ سلیمان احمد خان نے وزیر اعظم کے پرنسپل سیکریٹری محمد اعظم خان کو ان غیرقانونی بھرتیوں کے خلاف شکایت کی۔

شکایت گزار نے موقف اپنایا کہ جن 32 افراد کو غیرقانونی طور پر بھرتی کیا گیا ہے، چند مواقعوں پر سینئر آفیشلز نے اپنے ذاتی ملازمین کو پی پی آر اے کے نچلے درجوں پر بھرتی کیا اور ان عہدوں کے اخبارات میں اشتہار بھی نہیں دیے گئے۔

درخواست گزار نے کہا کہ ان 32 افراد کی بھرتی قانون کی خلاف ورزی، اختیارات کا غلط استعمال کے ساتھ ساتھ قانونی ضابطوں کو پورا کیے گئے سرکاری دفتر کا غلط استعمال اور انہیں غصب کرنا ہے۔

جن 32 افراد کی بھرتی پر اعتراض اٹھایا گیا ان میں تین ڈپٹی ڈائریکٹر کے عہدے بھی شامل ہیں جن پر علی تیمور، یاسر شمیم خان اور رضوان محمود خان کو ابتدائی طور پر عارضی بنیادوں پر بھرتی کیا گیا اور اس موقع پر بھی اصولی قواعد و ضوابط کو بالائے طاق رکھ دیا گیا تھا۔

ان میں سے اکثر بھرتیاں مبینہ طور پر سابق منیجنگ ڈائریکٹر پی پی آر اے محمد خالد جاوید کی ہدایات پر کی گئیں اور حتیٰ کہ نچلے درجوں پر اپنے ذاتی ملازمین کو بھی بھرتی کیا۔

پبلک پروکیورمنٹ ریگولیٹری اتھارٹی کے ایک سینئر آفیشل نے میڈیا کو بتایا کہ ابتدائی طور پر ان افراد کو عارضی بنیادوں پر بھرتی کیا گیا تھا البتہ سید خورشید احمد شاہ کی زیر سربراہی قائم کابینہ کی زیلی کمیٹی نے ان افراد کو مستقل بنیادوں پر نوکری دے دی تھی حالانکہ اس وقت ادارے میں کوئی بھی ایسی مستقل نوکری کی آسامی خالی نہیں کہ جس پر جزوقتی ملازمین کو بھرتی کیا جاتا۔

یہاں یہ بات بھی قابل ذکر ہے کہ آڈٹ جنرل نے اس بات کی بھی نشاندہی کی کہ پی پی آر اے نے فنانس ڈویژن سے منظوری لیے بغیر ہی ان افراد کو نوکریوں پر مستقل کر دیا تھا۔


About the author

عدیل رحمان (معاون مُدیر)

عدیل رحمان پاک ایشیاء میں بطور معاون مُدیر کے طور پر اپنی خدمات ادا کر رہے ہیں- یہ پاک ایشیاء کے ابتدائی ساتھیوں میں سے ایک ہیں اور انتہائی جانفشانی سے کام کرتے ہیں اللہ تعالیٰ نے انہیں منفرد تخلیقی صلاحیتوں سے نوازا ہے جس کا اظہار اکثر اُن کی خبروں کی سُرخیوں سے بھی لگایا جا سکتا ہے۔

Add Comment

Click here to post a comment

This site uses Akismet to reduce spam. Learn how your comment data is processed.




From Google